Говор на м-р Никола Ристевски на „Масленица 2021“ во Меѓународен Славјански Универзитет по повод претставувањето на првата книга за Свети Николе на руски јазик – „Свети-Николе – главное поселение Овчепольской котловины“, интегрален текст.
Здраво живо, почитувани гости. Ви благодариме за укажаното внимание и одделеното време за присуство на овогодинешното празнување на Масленица во Меѓународниот Славјански Универзитет во Свети Николе. Јас сум Никола Ристевски, магистер по економски науки, публицист и продуцент. Веќе една деценија активно ги истражувам природните ресурси, културното наследство и економскиот потенцијал на мојот роден крај Овче Поле. Член сум на меѓународната научна асоцијација SB Research Group, која се занимава со архео-акустика и го проучува влијанието на светите места врз човечкиот мозок. Работам и како надворешен соработник и преведувач за Меѓународниот Славјански Универзитет. Со тимот на Продукција „Аристон“ создаваме документарни филмови, а повеќе за нашата работа може да се прочита и на интернет страницата ovcepole.mk.
Изданието кое го промовираме денес е превод на руски јазик на книгата Свети Николе – главната населба во Овчеполската Котлина, која беше објавена пред три години на македонски јазик. Ова е мојата 12та книга, изданијата започнаа со Имагинариум во 2016 и продолжија со петте Зборници за Овче Поле, Зборниците за Кратово и Свети Николе, споменатата книга за Свети Николе, книгата За Овчеполските работи и збирката Овчеполски приказни.
Сликата на корицата на книгата е од првиот научен труд за градчето Свети Никола од 1936 година, напишан од Мане Чучков. Насловот на изданието е инспириран од вториот научен труд за Свети Николе од 1962 година, напишан од Јован Трифуноски. Во оваа книга можете да прочитате дека до пред 75 години, нашиот град официјално бил именуван како Свети Никола. Во книгата се содржани кратки описи на минатото на големото Овчеполие, податоци за старите патишта и друмови кои минувале овде, информации за населбата Свети Никола од 19 век, приказ на случувањата во градот во 20 век, текст за народните култови и традиции од нашиот краj, дополнети со неколку фотографии, мапи и преводи на извадоци од стари книги. Можеби за некои изданието изгледа мало по формат и содржина, но оние што веќе ја прочитале книгата знаат за тежината на авторскиот текст и обемноста на понудените информации.
За пишување на оваа книга се употребени податоци од дигиталните библиотеки на Македонија, Бугарија, Србија, Хрватска, Словенија и неколку интернет архиви на англиски јазик. Текстот на книгата содржи информации и од 15 стари списанија од крајот на 19 и почетокот на 20 век, околу 30 книги од мојата лична роднокрајна библиотека, податоци од дузина стари весници од Македонија, Бугарија и Србија, извори од 20ина стари книги на руски, српски и бугарски јазик од 19 и 20 век, дополнети со факти од официјални службени гласници од поранешна Југославија и независна и суверена Република Македонија. Описот на Свети Николе во книгата се однесува на периодот од првите познати податоци за населбата па сè до крајот на 20 век. Се надевам дека ќе ме послужи здравјето и ќе дочекаме поубави времиња за да објавиме и книга за Свети Николе во која би биле опишани првите децении на 21 век.
„Свети-Николе – главное поселение Овчепольской котловины“ е прва книга за нашиот град на руски јазик. Преводот го направи Костадин Голаков, а лектурата е на Софија Алимпиевич. Благодарност до мојот пријател д-р Јордан Ѓорчев за одлуката со која нашата книга стана дел од овогодинешниот настан и добивме можност да го претставиме нашиот град во книга на еден од најговорените светски јазици.
Денешно Свети Николе претставува главна населба во Овчеполската Котлина одамна, а на територијата каде што е денешниот град се потврдени пронајдоци не само од средниот век, туку и од ранохристијанскиот период, антиката, но и неолитот, што го покажува цивилизацискиот континуитет на овие простори. Поволните климатски услови, неограничените природни ресурси, културното наследство и економскиот потенцијал на Овче Поле се вистински предизвик за човештвото во 21 век. И покрај проблемите со кои се соочува локалното население во секојдневието, состојбата на постоечката инфраструктура и сегашните услови за живот и работа во регионот, сепак кај народот постои свест за значењето и важноста на Овче Поле, но и за економскиот потенцијал со кој располагаме. Се надевам дека нашиот град Свети Николе ќе добие прилика да прерасне во вистинска главна населба на Овчеполската Котлина во 21 век, која би била економски, образовен, туристички, еколошки и културен центар на целиот Овчеполски регион и во следните децении.
Благодарност до тимот на МЦСП и МСУ. Ви благодарам за присуството, благодарност и до Амбасадорот на Руската Федерација за вниманието.
За многу години Масленица и Прочка, да сте живи и здрави.
Ви благодарам.
